Waxaa jirta siyaasad guun ah oo gumaysi meeluu joogaba uu adeegsado oo ah – qaybi oo xukun -. Sabatoo ah wuxuu ogyahay gumaysiga inuusan ka guulaysan karin umad u midowday iska dulqaadista heeryada gumaysigiisa.
Siyaaba kala duwan ayuu adeegsadaa gumaysiga si marka ay xeelad ka fashilantaba uu mid kale ula soo boxo, suu u helo marwalba bulsho kala qaybsan oo cadaawad iyo colaad joogta ay ka dhexeyso.
Shirqoolada uu horey u soo tijaabiyay gumaysiga wayaanaha oo intaba ay fashilyeen bulshadeena gumaysi diidka ah iyo CWXO oo isku duuban waxaa ka mid ahaa;
1- Ciqaab joogta ah oo shacab aan waxba galabsan si wadar ah loo mariyo, si loo cabsi galiyo reeraha ka agdhow aaga lagu ciqaabayo shacabka. Falalkan oo wali sidii u socda ayaa waxaa fulinaya ciidanka wayaanaha iyo qaar gacan-ku-dhiigleyaal ah oo u astaamaysan jabhadda.
2- Waxaa ka mid ahaa, in beelaha qaar si gooni ah loo ciqaabo, si loo ogolaysiiyo inay gumaysiga kula gorgortamaan badbaadin-tooda taasoo ah inay ka ilaalinayaan naftood-hurayaasha tuulooyinka ay dagaan iyo aagaga ka ag-dhow.
3- Waxaa ka mid ahaa in odayaal bulshada magac ku lahaa iyo qaar sheeganayay aqoon diineed la shiriyay oy soo saareen bayaano la leeyahay waxay kaga soo horjeedaan jabahdda.
4- Waxaa ka mid ahaa, in xubno daba-qoodhi ah la joojiyo wadooyinka oy dhibaan safarada iyagoo iska dhigaya CWXO. Ama intay iska dhigaan qaar ka soo goostay xeryahoodii oo ku soo birey CWXO, muddo ka dibna dib ku noqda oo iska dhiga ciidankii jabhadda oo isa soo dhiibay oo taleefishinka cadawga laga soo saaro sawiradooda iyagoo ka warbixinaya.
Falal kala duwan oo kuwaa la mid ah ayuu soo tijaabiyey cadawga iyo kuwa u adeega oo intaba la fashilyay.
Walalayaal; markuu ku fashilmay cadawga dagaaladii ugu dambeeyay oo dhamaan ciidankuu soo hawl-galiyay iyo wixii agtiisa ku hadhay ee daba-qoodhiga ahaa laga dhigay qaar la laayay iyo qaar is-dhiibay, iyo intii soo hadhay oo dib ugu soo carartey xeryihii ay ka soo duuleen, ayuu hadda bilaabay shirqool uu doonayo inuu ku abuuro iska-horimaad qabiil iyo dagaal sokeeye oon dhamaad lahayn. Qorshahan oon waxba dhaamin kuwii ka horeeyay ayaa waxaa loo dhigay in loo fuliyo siyaabaha soo socda;
A. Koox daba-qoodhi ah ayaa loo dirayaa reera meel yaala oo intay galaan rag iyo caruurba ka laynaya.
B. Marka ay laayaan ayaa waxaa dusha laga saarayaa reeraha agtooda ah ee la doonayo in la’iska horgeeyo.
C. Waxaa dhacda in odayaashii isku daya inay arinta wax ka qabtaan la wada xidh-xidho iyagoo lagu eedeynayo inay jabhadda la shaqeeyaan.
D. Waxaa dhacda in dadka la laayay qaar la bah ah lagu wargaliyo inay diidaan waanwaan kasta oo ka soo horjeeda in dagaal lagu qaado beesha la calaamadiyay.
Jabhadda Wadaniga Xoreynta Ogadenya markay si dhab ah u ogaatay shirqoolkan iyo ujeedada uu ka leeyahay gumaysiga ee ah inuu bulshadeena ku mashquuliyo dagaal sokeeye oo ka jeediya xabadda ku socota ciidankiisa, wuxuu ugu baaqayaa dhamaan dadweynaha Somaliyeedee Ogadenya;
1- Inay iska jiraan shirqoolkan oy ka warhayaan dhaq-dhaqaaqa gacan-ku-dhiiglayaasha loo soo adeegsaday fulinta shirqoolkan.
2- Inay ogaadaan shirqoolkan in lagu fashilin karo oo kali ah dulqaad iyo feejignaan iyo ilaalinta wada-dhalashada iyo islaaminamada ka dhexeysa shacabka Somlaiyeed ee Ogadenya.
3- In wixii dhib ah ama khilaafaad ah ee soo kala dhex gala bulshada lala socodsiiyo CWXO. Iyaga ayaa daba gali doona raadadka dhaliyay dhibaatada oo xal lagu diirsadana ka gaari doona haduu Alla idmo.
4- Waxay Jabhadda Wadaniga Xoreynta Ogadeenya digniin culus oo kama dambays ah siinaysaa kuwa fulinaya shirqoolkan lagu dhibaataynayo shacabka.
Waxaan Ilaahay uga baryayaa umadeena inuu ka ilaaliyo shirqoolada cadawga dhibaatada gumaysigana uu ka dulqaado.
Waxaa jirta siyaasad guun ah oo gumaysi meeluu joogaba uu adeegsado oo ah – qaybi oo xukun -. Sabatoo ah wuxuu ogyahay gumaysiga inuusan ka guulaysan karin umad u midowday iska dulqaadista heeryada gumaysigiisa. 
